میں اپنے آسمانی باپ کی بے حد شکر گزار ہوں کہ اُس نے مجھے آج آپ سب کے ساتھ اپنی گواہی بانٹنے کا موقع دیا۔

میرا نام جارونیا ڈورس ہے،

 اور میں گزشتہ چار سال سے کلیسائے یسوع مسیح برائے مقدسین آخری آ یام کی رکن ہوں۔

آج میں اپنے ایمان کے سفر اور اُن بے شمار آزمائشوں اور برکتوں کے بارے میں بتانا چاہتی ہوں جن میں آسمانی باپ نے میری راہنمائی کی۔

میری زندگی آسان نہیں تھی۔ بچپن ہی سے میرے دل میں خدا کے بارے میں جاننے اور کلیسیا جانے کی خواہش تھی۔ جیسے جیسے میں بڑی ہوئی، بپتسمہ لینا میرے لیے بہت اہم بن گیا۔ لیکن بپتسمہ لینے کا فیصلہ میری زندگی کا آسان فیصلہ نہیں تھا۔

جب میں نے فیصلہ کیا کہ میں بپتسمہ لینا چاہتی ہوں،

 تو میں نے اپنے خاندان سے بات کی۔ سب سے بڑی رکاوٹ یہ تھی کہ میرے والد اس بات سے متفق نہیں تھے۔ میں نے پانچ ماہ تک اپنے خاندان کو قائل کرنے کی کوشش کی، لیکن میں اُن کی رائے تبدیل نہ کر سکی۔ میں خود کو بے بس محسوس کرتی تھی۔ آخرکار میں نے دعا کا سہارا لیا۔ میں مسلسل دعا کرتی رہی اور آسمانی باپ سے راہنمائی مانگتی رہی کیونکہ میں جانتی تھی کہ میں کوئی غلط کام نہیں کر رہی۔ میں اپنی زندگی کے سب سے اہم فیصلوں میں سے ایک کر رہی تھی، لیکن ایسا لگتا تھا کہ کوئی بھی مجھے سمجھنے کے لیے تیار نہیں تھا۔

آخرکار میں نے اپنے بپتسمہ کے ساتھ آگے بڑھنے کا فیصلہ کیا۔

میرے خاندان کو اس کے بارے میں معلوم تھا، لیکن میرے والد نے بپتسمہ کی رسم میں شرکت نہ کرنے کا فیصلہ کیا۔ بپتسمہ کے دن میری سب سے بڑی قوت آسمانی باپ اور وہ لوگ تھے

جو میرے ساتھ کھڑے تھے۔ جب میں بپتسمہ کے پانی میں اتری تو میں نے حقیقتاً محسوس کیا کہ میں نے اپنی پرانی زندگی پیچھے چھوڑ دی ہے اور ایک نئی زندگی حاصل کی ہے۔

بپتسمہ کے بعد بھی زندگی آسان نہیں ہوئی۔

 اپنی زندگی میں مجھے تکلیف، تنقید، دھوکہ اور بہت سی آزمائشوں کا سامنا کرنا پڑا۔ بعض اوقات میں سوچتی تھی کہ شاید خود پر ایمان رکھنا میری غلطی تھی۔

لیکن پھر مجھے احساس ہوا کہ میرا ایمان میرے خوف سے زیادہ مضبوط ہے۔ میرے ایمان نے کبھی مجھے مایوس نہیں کیا۔ جب ہر چیز ناممکن لگتی تھی، اُس نے مجھے امید اور طاقت دی۔

میرے بپتسمہ کے ایک ہفتے بعد، میرے والد نے مجھے کلیسیا جانے سے منع کر دیا۔

 میں کئی بار روئی کیونکہ مجھے کلیسیا جانا، دوست بنانا اور خدا کے بارے میں مزید سیکھنا بہت پسند تھا۔ پانچ یا چھ اتوار کلیسیا سے دور رہنے کے بعد،

میں نے اپنے والد سے بہت درخواست کی کہ وہ مجھے جانے دیں۔ آخرکار مجھے واپس جانے کا موقع ملا،

اور جب میں واپس گئی تو مجھے کلیسیا میں اپنی پہلی ذمہ داری (کالنگ) ملی۔

اس ذمہ داری نے میری زندگی بدل دی۔ اس سے پہلے میں نے کبھی بائبل یا مورمن کی کتابِ کا گہرائی سے مطالعہ نہیں کیا تھا۔

لیکن جیسے جیسے میں زیادہ سرگرم ہوئی، میرا اعتماد بڑھتا گیا اور میں روحانی طور پر مضبوط ہوتی گئی۔ میں وہ لڑکی تھی جو خاموشی سے پیچھے بیٹھ کر دوسروں کو سنتی تھی۔

میں وہ لڑکی تھی جو ہمیشہ سوچتی تھی، "میں کچھ نہیں کر سکتی، میں کافی نہیں جانتی۔”

لیکن آسمانی باپ نے مجھے دکھایا کہ میں اپنی سوچ سے کہیں زیادہ کر سکتی ہوں۔

ہر اتوار جب میں اپنی گواہی پیش کرتی تھی، میں اپنی زندگی میں تبدیلی محسوس کرتی تھی۔

میں زیادہ پُراعتماد، ایمان میں زیادہ مضبوط اور آسمانی باپ کے زیادہ قریب ہوتی جا رہی تھی۔ میرے خاندان نے بھی یہ تبدیلیاں محسوس کیں۔ اگرچہ انہوں نے کبھی کھل کر اس کا اعتراف نہیں کیا، لیکن وہ دیکھ سکتے تھے کہ میں ایک بہتر انسان بن رہی ہوں۔

پھر چند مہینوں بعد میرے والد کا انتقال ہو گیا۔

اپنے والد کو کھونا میری زندگی کے سب سے مشکل تجربات میں سے ایک تھا۔ لیکن چونکہ میں نجات کے منصوبے کے بارے میں جان چکی تھی،

اس لیے مجھے تسلی اور امید ملی۔ اگر مجھے نجات کے منصوبے کا علم نہ ہوتا تو شاید میں مکمل طور پر ٹوٹ جاتی ۔

لیکن میں جانتی تھی کہ آسمانی باپ ہمارے لیے ایک منصوبہ رکھتا ہے اور خاندان ہمیشہ کے لیے ایک ساتھ رہ سکتے ہیں۔

وقت گزرنے کے ساتھ مجھے احساس ہوا کہ انجیل نے میری زندگی کو کتنا بدل دیا ہے۔ میں اب وہ شخص نہیں رہی تھی جو پہلے تھی

۔ میں زیادہ مضبوط، زیادہ باایمان اور زیادہ پُراعتماد بن چکی تھی۔

آج جب میں کلیسیا میں کھڑے ہو کر بات کرتی ہوں تو میں جانتی ہوں کہ یہ صرف آسمانی باپ کی مدد سے ممکن ہوا ہے۔

میری زندگی کی سب سے بڑی برکتوں میں سے ایک یہ ہے کہ میں اپنے چھوٹے بھائی کے لیے ایک اچھا نمونہ بن سکی ہوں۔

میں اپنی والدہ کو دوبارہ کلیسیا لانے میں بھی مدد کر سکی ہوں۔ یہ برکتیں میرے لیے بہت معنی رکھتی ہیں کیونکہ یہ مجھے دکھاتی ہیں

کہ جب ہم وفادار رہتے ہیں تو آسمانی باپ ہمارے ذریعے کام کرتا ہے۔

ایک وقت ایسا بھی تھا جب میں خود کو بالکل تنہا محسوس کرتی تھی، لیکن آسمانی باپ ہمیشہ میرے ساتھ تھا۔ جب کوئی اور مجھے سمجھتا ہوا نظر نہیں آتا تھا،

تب بھی وہ مجھے سمجھتا تھا۔ جب میں خود کو کمزور محسوس کرتی تھی، تب اُس نے مجھے طاقت دی۔

اسی لیے میں جانتی ہوں کہ اگر ہم وفادار رہیں، خدا کے ساتھ اپنا تعلق مضبوط کریں اور اُس کے لیے وقت نکالیں،

تو وہ ہر چیلنج میں ہماری مدد کرے گا۔ میں نے اپنی زندگی میں یہ حقیقت دیکھی ہے۔ میں جانتی ہوں کہ خدا ہمیں برکت دیتا ہے

جب ہم اُس پر بھروسا کرتے ہیں اور اُسے اپنی زندگی میں پہلی ترجیح دیتے ہیں۔

آج مجھے یسوع مسیح کی کلیسیا کی رکن ہونے پر فخر ہے۔ مجھے کلیسیا کی رکن بنے ہوئے چار سال ہو چکے ہیں،

اور ان چار برسوں میں میں نے اپنی زندگی میں بے شمار برکتیں،

معجزے اور مثبت تبدیلیاں دیکھی ہیں۔ جب میں ماضی کی طرف دیکھتی ہوں تو واضح طور پر محسوس کرتی ہوں کہ آسمانی باپ نے ہر آزمائش، ہر مشکل اور ہر اہم فیصلے میں میری راہنمائی کی۔

میں جانتی ہوں کہ آسمانی باپ زندہ ہے۔ میں جانتی ہوں کہ یسوع مسیح ہمارے نجات دہندہ ہیں۔ میں جانتی ہوں کہ انجیل زندگیوں کو بدلتی ہے۔

میں جانتی ہوں مورمن کی کتاب سچی ہے۔ میں جانتی ہوں کہ یسوع مسیح کی کلیسیا برائے مقدسینِ آخری آ یام آج زمین پر یسوع مسیح کی بحال شدہ کلیسیا ہے۔

میں جانتی ہوں کہ آج جو تجربات میں نے آپ کے ساتھ بیان کیے ہیں وہ سچے ہیں، اور میں جانتی ہوں کہ آسمانی باپ ہم میں سے ہر ایک سے محبت کرتا ہے اور ہماری آزمائشوں میں ہماری راہنمائی کرتا ہے۔

میں یہ سب باتیں یسوع مسیح کے نام پر کہتی ہوں، آمین۔